महिला उद्यमी महासङ्घ नेपाल (एफवेन)ले ‘अन्तर्राष्ट्रिय महिला व्यापार मञ्च’ को विशेष कार्यक्रम आयोजना गरेको छ । ‘हाम्रो नीतिगत सुधार, महिला उद्यमीको सुदृढीकरण’ भन्ने मूल मर्मका साथ आयोजित कार्यक्रममा नेपालका विभिन्न क्षेत्रका प्रतिष्ठित व्यक्तित्वहरू, सांसदहरू, विदेशी कूटनीतिज्ञहरू र उद्यमीहरूको उत्साहजनक सहभागिता रहेको छ ।
कार्यक्रममा प्रमुख अतिथिका रूपमा उपस्थित माननीय सांसद समीक्षा बास्कोटा, श्रीलंका र पाकिस्तानका महामहिम राजदूतहरू, अमेरिकी दूतावासका राजनीतिक तथा आर्थिक मामिलाका उप–परामर्शदाता, नेपाल सरकारका उच्च पदस्थ अधिकारीहरू, विकास साझेदारहरू, महासङ्घका संस्थापकहरू, पूर्व अध्यक्षहरू, सल्लाहकारहरू र अनलाइनमार्फत जोडिनुभएका अन्तर्राष्ट्रिय विज्ञहरूलाई स्वागत गर्दै राष्ट्रिय प्राथमिकता र महिला नेतृत्वका उद्यमहरूको भविष्य निर्माणमा यो संवाद कोशेढुङ्गा साबित हुने विश्वास व्यक्त गर्नुभयो। कार्यक्रमको उद्घाटन गर्दै महिला उद्यमी महासङ्घ नेपालकीअध्यक्ष दर्शना श्रेष्ठले आमन्त्रित सम्पूर्ण विशेष अतिथिहरूलाई हार्दिक स्वागत गर्नुभयो।
कार्यक्रममा सांसद बासुमाया तामाङ, अनुष्का श्रेष्ठ, विदुषी राणासमेतको उपस्थित रहेको थियो । उहाँहरूले महिला उद्दमशीलतालाई अझ अगाडि बढाउनुपर्नेमा जोड दिनु भयो । योजना आयोगका सदस्य डा पुकार मल्लले महिला उद्यमशीलतालाई फड्को मार्न र उद्यमशीलताद्वारा देशको आर्थिक रूपान्तरण गर्न विभिन्न नीति तथा कार्यक्रमका योजनाहरू आउने विश्वास पनि दिलाउनु भएको थियो।
अध्यक्ष श्रेष्ठले सन् २००३ मा स्थापना भएदेखि नै महिला उद्यमी महासङ्घले नेपालमा महिला उद्यमीहरूको साझा आवाजका रूपमा वकालत, क्षमता अभिवृद्धि, व्यवसायिक सहयोग, सञ्जाल निर्माण र नीतिगत पैरवी गर्दै आएको स्मरण गराउनुभयो। यो मञ्च कुनै एउटा एक्लो कार्यक्रम नभई महासङ्घले विगत केही महिनादेखि ‘सेन्टर फर इन्टरनेसनल प्राइभेट इन्टरप्राइज’ (सिआइपिइ) को सहयोगमा सञ्चालन गरिरहेको ‘महिला उद्यमीहरूको प्रवर्द्धनका लागि नीतिगत सुधार’ सम्बन्धी श्रृङ्खलावद्ध संवादको उपज भएको प्रष्ट पार्नुभयो। महासङ्घले देशका विभिन्न प्रदेशहरूमा प्रादेशिक परामर्श गर्दै मधेश प्रदेशबाट यसको सुरुवात गरेर तल्लो तहका महिला उद्यमीहरूको वास्तविक समस्या र सुझावहरूलाई सङ्कलन गरी बलियो प्रमाणको आधार तयार पारेको छ।
नेपाल सरकारले हालै ल्याएको बजेट र नीतिगत दिशा निर्देशहरूले उद्यमशीलता प्रवर्द्धन, नवप्रवर्तन विकास, निजी क्षेत्रको वृद्धि, रोजगारी सिर्जना र महिलाहरूको समावेशी सहभागितामा विशेष जोड दिएकोमा महासङ्घले खुसी व्यक्त गरेको छ। सरकारले ल्याएको महिला उद्यमशीलता विकास रणनीतिलाई महिला उद्यमीहरूलाई संस्थागत सहयोग पुर्याउने एउटा ठूलो उपलब्धिका रूपमा स्वागत गरिएको छ।
उहाँले अहिले विभिन्न प्रवर्द्धनात्मक कार्यक्रमहरूमार्फत कार्यरूपमा परिणत गरिँदै लगिएको र सरकारको उद्यम नेपालको दूरदर्शी अवधारणाले उद्यमशीलतालाई आर्थिक रूपान्तरणको केन्द्रमा राखेको भन्दै महासङ्घले यस राष्ट्रिय अभियानमा पूर्ण ऐक्यबद्धता जनाएको छ।
यस पटकको नीतिगत मस्यौदालाई व्यावहारिक, वस्तुनिष्ठ र कार्यान्वयनयोग्य बनाउन नेपाल सरकारकी पूर्व सचिव यामकुमारी खतिवडाले विशेष मार्गनिर्देशन र कानुनी परामर्श प्रदान गर्नुभएको छ। उद्योग, वाणिज्य तथा आपूर्ति मन्त्रालय र महिला, बालबालिका तथा जेष्ठ नागरिक मन्त्रालयमा लामो समय सेवा गर्नुभएकी खतिवडाको गहिरो नीतिगत अनुभवले महिला उद्यमीका वास्तविक समस्या र राष्ट्रिय प्राथमिकताबीचको खाडललाई पुर्न ठूलो मद्दत गरेको अध्यक्ष श्रेष्ठले उल्लेख गर्नुभयो ।
यस मञ्चको मुख्य उद्देश्य राष्ट्रिय परामर्श प्रक्रियाबाट प्राप्त भएका तथ्य र निष्कर्षहरूलाई सरोकारवालाहरूमाझ प्रस्तुत गरी एउटा ठोस नीतिगत मस्यौदा तयार पार्नु हो। उक्त मस्यौदालाई महिला उद्यमी महासङ्घले औपचारिक रूपमा नेपाल सरकारका विभिन्न मन्त्रालयहरू र सम्बन्धित निकायहरूमा बुझाउने छ, जसले देशको आर्थिक रूपान्तरणमा महिला उद्यमीहरूलाई मूल प्रवाहीकरण गर्न थप टेवा पुर्याउनेछ ।
‘सङ्गै काम गरौँ, सङ्गै सफल बनौँ’ भन्ने सरल तर शक्तिशाली सिद्धान्तलाई आत्मसात् गर्दै अघि बढेको महिला उद्यमी महासङ्घले यस मञ्चमार्फत देशभरका महिला उद्यमीहरूका लागि वित्तीय पहुँच, बजार, सीप, प्रविधि र अवसरहरूमा सहज पहुँच स्थापित गर्ने स्पष्ट लक्ष्य राखेको छ। सरकारी महत्वाकांक्षा, नीतिगत दिशा र तल्लो तहका महिला उद्यमीका वास्तविक आवश्यकताहरूको त्रिवेणी बनेको यस अन्तर्राष्ट्रिय मञ्चले नेपालमा व्यवसायमैत्री र समावेशी वातावरण निर्माण गर्ने दृढ सङ्कल्प दोहोर्याएको छ।
प्रतिक्रिया