फिफा विश्वकप २०२६ अन्तर्गत अन्तिम ३२ को अत्यन्तै रोमाञ्चक र नाटकीय खेलमा सेनेगलमाथि ३–२ को जित निकाल्दै बेल्जियम प्रतियोगिताको अन्तिम १६ मा प्रवेश गरेको छ ।
अमेरिकाको सियाटलमा निर्धारित ९० मिनेटको खेल २–२ को बराबरीमा सकिएपछि अतिरिक्त समयमा धकेलिएको खेलको अन्तिम क्षणमा भीएआर पेनाल्टीमार्फत गोल गर्दै बेल्जियमले रोमाञ्चक जित हात पारेको हो ।
नेपाली समय अनुसार बिहीबार बिहान १ः४५ बजे सुरु भएको खेलमा फिफा वरीयताको १५औँ स्थानमा रहेको सेनेगलले ९ औँ स्थानको बेल्जियमविरुद्ध सुरुवाती आक्रामक खेल प्रदर्शन गर्यो ।
खेलको २४ औँ मिनेटमा हबिब डियाराले गोल गर्दै सेनेगललाई १–० को सुरुवाती अग्रता दिलाएका थिए । दोस्रो हाफको सुरुवातमै अर्थात् ५१औँ मिनेटमा स्ट्राइकर इस्माइला सारले अर्को गोल थपेपछि सेनेगल २–० को आरामदायी स्थितिमा पुगेको थियो ।
तर, खेल सकिन मात्र ४ मिनेट बाँकी छँदा बेल्जियमले खेलमा अविश्वसनीय कमब्याक गर्यो । खेलको ८६औँ मिनेटमा बेल्जियमका भरपर्दा स्ट्राइकर रोमेलु लुकाकुले गोल फर्काउँदै गोल अन्तरलाई २–१ मा झारे । त्यसको तीन मिनेटपछि अर्थात् ८९औँ मिनेटमा मिडफिल्डर युरी टिलेमान्सले उत्कृष्ट गोल गर्दै निर्धारित समयको खेललाई २–२ को बराबरीमा ल्याए ।
त्यसपछि खेल ३० मिनेटको अतिरिक्त समयमा धकेलिएको थियो । अतिरिक्त समयको पहिलो १५ मिनेटमा दुवै टोलीले निकै संघर्ष गरे पनि गोल हुन सकेन र अतिरिक्त समयको मध्यान्तरसम्म पनि खेल २–२ कै स्थितिमा रह्यो ।
खेल पेनाल्टी सुटआउटतर्फ अघि बढिरहेका बेला अतिरिक्त समयको इन्जुरी समयमा भीएआरको लामो रिभ्यू पछि बेल्जियमले पेनाल्टीको अवसर पायो । उक्त महत्त्वपूर्ण अवसरमा युरी टिलेमान्सले पेनाल्टीलाई गोलमा परिणत गर्दै बेल्जियमलाई ३–२ को सनसनीपूर्ण जित दिलाए ।
प्रतिक्रिया