राष्ट्रिय परीक्षा बोर्डले यस वर्षको कक्षा १२ को नतिजा परीक्षा सकिएको ४५ दिनभित्रै सार्वजनिक गर्ने गरी तीव्र तयारी गरिरहेको छ । विगतमा नतिजा प्रकाशनका लागि करिब तीन महिना लाग्ने गरेकोमा यसपटक प्रक्रियामा सुधार गर्दै बोर्डले छिटो नतिजा दिने लक्ष्य राखेको हो ।
बोर्डले नतिजा प्रकाशनको कामलाई तीव्रता दिँदै हालसम्म ५० प्रतिशतभन्दा बढी प्रक्रिया पूरा गरिसकेको जनाएको छ ।
परीक्षा नियन्त्रक कृष्ण शर्माका अनुसार देशभरका ४२ केन्द्रमा उत्तरपुस्तिका परीक्षण भइरहेको छ । कामलाई छिटो छरितो बनाउन उत्तरपुस्तिका परीक्षणसँगै सम्परीक्षण र प्राप्तांक कम्प्युटरमा प्रविष्ट (इन्ट्री) गर्ने कार्य पनि सँगसँगै अगाडि बढाइएको छ ।
यसअघि नतिजा सार्वजनिक गर्न सामान्यतया तीन महिना लाग्ने गरेकोमा यसपटक परीक्षा सकिएकै दिनदेखि काम सुरु गरिएको थियो । बोर्डले हालै एसइईको नतिजा पनि २९ दिनमै सार्वजनिक गरेर रेकर्ड बनाएको थियो । यस वर्षको कक्षा १२ को परीक्षामा देशभरबाट ४ लाख १८ हजार परीक्षार्थी सहभागी भएका छन् ।
बोर्डको यस कदमले उच्च शिक्षा अध्ययनका लागि तयारी गरिरहेका विद्यार्थीहरूलाई निकै सहज हुने अपेक्षा गरिएको छ ।
प्रतिक्रिया