मानव धर्मका प्रणेता एवं भारतको उत्तर प्रदेश सरकारका पर्यटनमन्त्री सतपालजी महाराजले भोटेकोशी बाढीबाट प्रभावित नेपाली नागरिकहरूको उद्धार तथा राहतका लागि १० लाख नेपाली रुपैयाँ आर्थिक सहयोग प्रदान गर्नुभएको छ।
यही भदौ १० गते नेपालको रसुवास्थित भोटेकोशीमा भीषण बाढी आएदेखि नै गहिरो दुःख व्यक्त गर्दै उहाँले सामाजिक सञ्जालमार्फत नेपाल र नेपाली जनताको पक्षमा उभिने प्रतिबद्धता जनाउनुभएको थियो। साथै सम्पूर्ण उत्तराखण्ड र भारत सरकार नेपाललाई आवश्यक पर्ने हरेक सहयोगका लागि तयार रहेको स्पष्ट पार्दै उहाँले यो दुःखको घडीमा सबैलाई संयमित रहन र पीडितहरूसँग ऐक्यवद्धता जनाउन अपिल गर्नुभएको थियो। यसअघि उत्तराखण्डका मुख्यमन्त्री पुष्कर सिंह धामीको विशेष उपस्थितिमा बाढीका मृतकहरूको स्मरणमा एक श्रद्धाञ्जली सभासमेत सम्पन्न भइसकेको छ।
सोही ऐक्यवद्धतालाई व्यवहारमा रूपान्तरण गर्दै मन्त्री सतपालजी महाराज आज दिल्लीस्थित नेपाली राजदूतावासमा पुग्नुभएको थियो। उहाँलेदूतावासका कार्यवाहक राजदूत डा. सुरेन्द्र थापालाई भेट गरी नेपाल सरकारको ‘प्रधानमन्त्री दैविप्रकोप उद्धार कोष’ मा जम्मा हुने गरी १० लाख रुपैयाँको सहयोग रकम हस्तान्तरण गर्नुभएको हो। विपद्को यस कठिन घडीमा प्राप्त भएको यस मानवीय सहयोगप्रति नेपाल पक्षले आभार प्रकट गरेको छ।
प्रतिक्रिया