नेपाल शैक्षिक परामर्श संघ (इक्यान) को आगामी नेतृत्वको लागि प्रवल दावेदार मानिएका वर्तमान प्रथम उपाध्यक्ष लक्ष्मण पौडेल (एन्ड्रु)ले अध्यक्ष पदमा आफ्नो उम्मेदवारी घोषणा गरेका छन् ।
ईक्यानलाई अझ बलियो, एकताबद्ध र दिगो संस्थाको रूपमा अगाडि बढाउने स्पष्ट प्रतिबद्धतासहित पौडेलले मंगलबार (आज) आगामी नेतृत्वका लागि अध्यक्ष पदमा उम्मेदवारीको घोषणा गरेका हुन् ।
इक्यानको चुवान यही पुस २८ गते हुने गरी मिति तोकिएको छ ।
शैक्षिक परामर्श क्षेत्रमा स्थापित व्यवसायीको पहिचान बनाएका र संस्थागत रुपमा प्रथम उपाध्यक्षको भूमिकालाई निष्पक्ष र जिम्मेवारीपूर्वक निर्वाह गरेका पौडेलले आफ्नो उम्मेदवारी स्वभाविक भएको बताए । ‘इक्यानको गरिमा उच्च राख्दै व्यवसायीक दक्षता अभिवृद्धि गर्नु नै मेरो पहिलो दायित्व हो,’ उनले भने, ‘व्यवसायी साथीहरुको आग्रह र संस्थागत जिम्मेवारी बोध गरेर मैले अध्यक्षमा उम्मेदवारी घोषणा गरेको हुँ ।’
वर्तमान कार्यसमितिमा रहेर कुशल कार्य सम्पादन गरेका पौडेल शैक्षिक परामर्श क्षेत्रमा एक अनुभवी, शालीन, जुझारु र सहयोगी व्यक्तित्वका रूपमा व्यवसायीमाझ परिचित छन् ।
संस्थागत हितका लागि सहमति र सहकार्य अपरिहार्य भएको भन्दै पौडेलले इक्यानको आगामी नेतृत्व पारदर्शी र स्वच्छ प्रतिष्पर्धाबाट चयन हुने बताए ।
पौडेलले अध्यक्षमा उम्मेदवारी घोषणा गरेसँगै आफ्नो छुट्टै प्यानलसमेत बन्ने बताएका छन् । यद्यपी आफ्नो प्यानलमा कुन कुन पदमा को को उम्मेदवार हुने टुंगो लागि नसकेको उनको भनाई छ ।
पौडेलको उम्मेदवारीलाई वर्तमान कार्यसमितिका अधिकांश सदस्यहरु एवं निवर्तमान तथा पूर्व कार्यसमितिका पदाधिकारी एवं सदस्यहरु र थुप्रै इक्यानियनहरुको समर्थन रहेको बताइएको छ ।
प्रतिक्रिया