वैदेशिक रोजगारसम्बन्धि स्वास्थ्य परीक्षण गर्ने स्वास्थ्य व्यवसायीहरुले सप्ताहव्यापी अन्तर्राष्ट्रिय आप्रवासन दिवसको अवसरमा बृहत निःशुल्क स्वास्थ्य शिबिर तथा रक्तदान कार्यक्रम संचालन गरेका छन् । स्वास्थ्य व्यवसायीहरुको छाता संगठन नेपाल स्वास्थ्य ब्यवसायी महासंघ, नेपाल मेडिकल ब्यवसायी संघ र गाम्का नेपालको संयुक्त आयोजनामा उक्त कार्यक्रम संचालन भएको हो ।
‘श्रम आप्रवासनका चक्रमा सुशासनः सुरक्षित, मर्यादित र सिपयुक्त आप्रवासन’ भन्ने मुल नाराकासाथ मनाइएको सप्ताहव्यापी अन्तर्राष्ट्रिय आप्रवासन दिवसको मुल आयोजक भने श्रम रोजगार तथा समाजिक सुरक्षा मन्त्रालय रहेको छ ।
महासंघका अध्यक्ष कैलास खड्काको सभापतित्वमा सम्पन्न कार्यक्रममा श्रम मन्त्रालयका सचिव डा कृष्ण हरि पुष्कर प्रमुख अतिथी, मन्त्रालयकै सहसचिव पिताम्वर घिमिरे बिशेष अतिथिको रुपमा रहेका थिए । त्यस्तै अन्य विशेष अतिथीहरुमा वैदेशिक रोजगार बिभागका महानिर्देशक कमल भट्टराई, वैदेशिक रोजगार बोर्डका कार्यकारी निर्देशक डा.द्वारिका उप्रेती, मलेसियन दूतावासका निमित्त राजदुत मा महमद फर्दोसको पनि उपस्थिती रहेको थियो ।
वैदेशिक रोजगारलाई सुरक्षित, मर्यादित र ब्यवस्थित गर्न सरोकारवाला सबैले हातेमालो गर्नुपर्ने आवश्यकता रहेको सचिव पुस्करले बताए । उनले आप्रबाशन दिवसको अवसर सम्पूर्ण श्रमिक वर्गको हित र व्यवसायीक पारदर्शीताप्रति सचेत रहन पनि आग्रह गरे ।
त्यस्तै महासंघका अध्यक्ष कैलाश खड्काले स्वास्थ्य ब्यवसायप्रती भएको विभेदबाट कुनै पनि व्यवसायी विचलित नहुन आग्रह गर्दै कानुनी राज्यमा न्याय पाउने कुरामा बिस्वस्त रहेको बताए । उनले कार्यक्रममा सहभागिताको लागि सबै सरोकारवाला, ब्यवासायी, सेवाग्राही र सञ्चारकर्मीलाई धन्यवाद व्यक्त गरे ।
निःशुल्क स्वास्थ्य शिबिर तथा रक्तदान कार्यक्रममा २३४ जनाले स्वास्थ्य सेवा लिएको मेडिकल व्यवसायी संघका महासचिव कृष्ण प्रसाद बजगाईंले बताए । उनका अनुसार सामान्य स्वास्थ्य परीक्षण १५४, स्त्रीरोग परामर्श २१, भिडियो एक्सरे सेवा ५३ जनाले लिएका छन् । त्यस्तै ३२ जनालाई औषधी वितरण गरिएको छ भने ५७ जानाले रक्तदान गरेका छन् ।
स्वास्थ्य ब्यवसायिको संयुक्त समितिमार्फत संचालन गरिएको उक्त कार्यक्रमको संयोजन धन बहादुर गिरिले गरेका थिए । कार्यक्रमको स्वागत मन्तब्य महेश्वर श्रेष्ठ र संचालन कृष्ण प्रसाद बजगाईले गरेका थिए ।
प्रतिक्रिया